Astaanta Calanka Cirdhow

	Soomaaliyeey toosoo ;
Astaanta Calanka Soomaaliya

Heesta calanka somaaliyeed:

Maanta oo kale 12ka Oktoobar waxay ku beeggan tahay sannad guuraddii ka soo wareegtay maalintii ugu horaysay ee la soo bandhigay naqshadda Calanka Soomaaliyeed la iskuna raacay, maalintaan oo ah maalin ku wayn quluubta shacbiga Soomaaliyeed, waa maalintii la go’aamiyay nooca uu noqonayo calnka Soomaaliya, taariikhdu markay ahayd 12kii Oktober 1954tii, waxaana naqshaddiisa hal abuuray Ilaahay ha u naxriistee halgamaa Maxamed Cawaale Liibaan.

Markii uu hidisay naqshadda Calanka wuxuu Marxuum Maxamed Cawaale Liibaan dood dheer la galay dad badan oo su’aalo ka weydiiyay astaamaha calanka, waxayna dooda ugu wayn ka imaaneysay dhanka Gumeystihii oo isagu markii hore diiday Calanka Buluugga ah.

Markii loo soo bandhigay Calanka ururka SYL, dood dheer ka dib waxaa la isku waafaqay Muxaafid iyo Mucaaridba Calanka uu soo bandhigay Maxamed Cawaale Liibaan, Cabdulkadir Cali Boolay oo ka mid ahaa halgamayaashii S.Y.L ayaa yir”waxaan nasiib u yeeshay in aan goob joog ka ahaa xilligaasi oo lagu soo bandhigay xarunta dhexe ee xisbigii SYL, waxaana cod buuxda la isku waafaqay in la qaato naqshadda uu soo bandhigay marxuum Maxamed Cawaale Liibaan,hase yeeshee markii loo geeyay maamulkii Talyaaniga ayaa diiday oo ku tilmaamay inuu u egyahay Calanka dalka Za’iir iyo kan Jamaciyadda Qaruumaha ka dhaxaysa “United Nations-ka” sidaasi darteed aan la ogolayn calan dal leeyahay, maamulkii Talyaaniga wuxuu ku adkaystay hindisihii uu soo bandhigay marxuum Maxamed Cawaale Liibaan in aan la qaadan Karin isagoo qiil uga dhigaya in uu egyahay calanka dalka Democtatic Republic of Congo Ex. Za’iir.

Balse Maxamad Cawaale Liibaan wuxuu Talyaaniga u sheegay in labada calan aanay isku mid ahayn sababtoo ah Calanka dalkii Za’iire horay loo oran jiray, xiddigta ku dhextaal waa mid Dahabi ama Huruud ah, sidaasi darteed dood dheer iyo wada tashi fara badan ka dib maamulkii Talyaaniga oo xiligaasi maamulaayay koonfurta soomaaliya wuxuu ogolaaday in la qaato calanka buluugga ah xiddigta cad dhexda kaga taallo.

Halgan dheer ka dib ummadda soomaaliyeed waxay ku guuleysatay una suurta gashay in ay yeelato calan aad u qurux badan ,kaasoo ka tarjumaya jiritaanka iyo himilada ummadeed oo ah in la helo soomaali midaysan.

Calanka Qaranka Soomaaliyeed oo maanta 65 sano jirsaday, wuxuu ku yimid halgan adag oo loo soo galay, halgankaas oo ay hoggaanka u hayeen dhallinyaraddii soomaaliyeed xisbigii SYL, kuwaas oo halgan qaraar la galay gumaystayaashii isu soo bahaystay umadda Soomaaliyed.

Miraha Heesta calanka somaaliyeed Waxaa ka mid ahaa:

Qolobaa calankeedu,waa ceynoo,

Innaga keenu waa,Cirkoo kale ee,

aan caadna lahayn,Ee caashaqaye.

Xidigyahay cadi, Waad raacii damisee,

Carradaa kaligaa aad uu curadee.

cadceeda sidii, noocaa noqoy'ee

Miraha Heesta qaranka somaaliyeed Waxaa ka mid ahaa:

Soomaliyeey Toosoo

Toosoo isku tiirsada eey

Hadba kiina taag daraneey

Taageera weligiineey.

Sharcigay isku kiin tolayoo

Luuqadaa tu waaxid ahoo

Arligiina taaka ahoo

Kuma kala tegeysaanee

Tiro adhi ah oo dhaxalaa

Sideed laydiin soo tubayoo

Ninba toban la meel marayoo

Cadowgiin idiin talin oo

Tulud geel ah oo dhacan baad

Toogasho u badheedhanee

Ma dhulkeeni oo tegey baan

cidi dhagax u tuurayneey

Qaran aan hubkuu tumayo

Tooreyda dhaafayn oo

Oo aan taar samayn karin

Uur ku taallo weynaa

Hadba waxaan laa ooyaayoo

ilmadu iiga qubaneysaa

Ikhtiyaar nin loo diidoo

La addoon sadaan ahayee